نوشکی دہشتگردی میں بھی بھارت کا ہاتھ، مرکزی ملزم نے اہم رازوں سے پردہ اٹھا دیا

نوشکی بلوچستان میں ہونے والی دہشت گردی کے پیچھے بھی بھارت نکلا، دھماکے کے مرکزی ملزم فرید بلوچ نے گرفتاری کے بعد اہم رازوں سے پردہ اٹھا دیا۔

سکیورٹی ذرائع کے مطابق کالعدم بی ایل اے کے مجید بریگیڈ کا دہشت گرد پاک افغان سرحد سے گرفتار ہوا، گرفتار ملزم فرید بلوچ نے بھارت سے رابطوں سے متعلق تمام راز اگل دیئے۔

گرفتار دہشت گرد نے کہا کہ بھارتی ایجنسی’’را‘‘ اور آر ایس ایس نے کالعدم بی ایل اے کی مدد سے منصوبہ بندی کی، بھارتی خفیہ ایجنسی را کے اہلکار نے افغانستان میں ملاقات کرکے منصوبہ بتایا۔ ملزم نے مزید بتایا کہ را ایجنٹ نے نوشکی دھماکے کے علاوہ دیگر دہشت گردی کیلئے ٹاسک بھی دیئے، را ایجنٹ سے افغانستان میں ملاقات کرکے ہدایت اور رقم لیتے تھے۔ رقم اور ٹاسک ملنے کے بعد را اور آر ایس ایس ایجنٹ سنیپ چیٹ پر رابطے میں رہتے تھے۔

گرفتار دہشت گرد نے بتایا کہ میرا کام را ایجنٹ سے ہدایت لیکر بی ایل اے کی مقامی قیادت تک پہنچانا ہوتا تھا۔